కాలం, కర్మం కలిసి రాక వక్రిస్తే ధర్మరాజంతటి వాడు కూడా కావి గుడ్డలు కట్టుకొని కంకుభట్టనే పేరుతో విరాటరాజు పంచజేరి ఊడిగం  చేయవలసి వచ్చింది.

ఓడలు బండ్లవుతాయి, బండ్లు ఓడలు అవుతాయని సామెత. 

కాలం కనుక అనుకూలించక పోతే ఎటువంటి దుర్దశ అయినా ప్రాప్తిస్తుంది. 

వివేకం కలిగి ప్రవర్తించాలి. అంతే కాని బేల మనస్సుతో ఏ అఘాయిత్యానికో పూనుకోకూడదు. కాలానుగుణంగా ప్రవర్తించాలి.

విధి చేష్టల వలన అప్పుడప్పుడు హైన్యదైన్యాలు తప్పవు. విధి చేష్టలకు తిరుగులేదు అనే భావం మనం కలిగి ఉండాలి. 

జీవితంలో సుఖదుఃఖాలు ఒకదాని తర్వాత ఒకటి వచ్చిపోతూంటాయి. ఎల్లకాలమూ సుఖమే ఉండదు. అలాగే ఎల్లకాలమూ దుఃఖమే ఉండదు.

కనుక సుఖం వచ్చినప్పుడు గర్వాన్నీ, దుఃఖం కలిగినప్పుడు విషాదాన్నీ ప్రకటించకుండా ప్రవర్తించాలి.

.