(558) (01.03.2026)

కన్న వాళ్ళు ఉన్నంత వరకు మా మధ్య బంధం బాగానే ఉంది

కన్న వాళ్ళు కను మూసినాక బంధం నెమ్మదిగా బీటలు వారింది

పెళ్ళిళ్ళు కాక ముందు మా అన్నదమ్ముల మంతా కలిసే ఉంటిమి

ఇంటికి కోడళ్ళు వచ్చినాక గొడవలు పడుతుంటిమి //

ఉమ్మడి కుటుంబంలో ముందుగా ఇంటి మధ్య గోడలు వెలిశాయి

ఆపై పొయ్యిలు వేరు అయినాయి 

ఎవరి వంట వాళ్ళు చేసుకుంటూ

ఎవరి ఖర్చులు వాళ్ళే పెట్టుకుంటూ //

నెమ్మదిగా జీవితాన్ని నెట్టుకొచ్చినాము

ఎవరి జీవితాలు వాళ్ళు గడుపుతున్నాము

కన్న వాళ్ళు చెప్పిన మాటలు పెడచెవిన పెడితిమి

ఎవరి కుటుంబాలు వాళ్ళవి అంటూ ఆనందంగా ఉంటిమి //

ఇది వరకులా మాటలు లేకున్నాయి

అవసరానికే మాటలు నడుస్తున్నాయి

ఊపిరి ఉన్నంత వరకు కట్టిన గోడలు కూలవు

ఈ ఉమ్మడి కుటుంబంలో గొడవలు ఆగవు  //

వంటింటి దగ్గర మొదలైన గొడవ ఖర్చుల వరకు వెళ్లింది

ఇంటికి పెద్ద దాన్ని అంటూ ఆరంభించి పెత్తనం ఎవరిదో తేలకుంది

ఒక్క చేయి కాస్తా నాలుగు చేతులుగా మారింది

అయినా ఈ రోజుకి రావణకాష్టం ఆరకుంది //

ఉమ్మడి ఆస్తి కాస్తా DEVELOPMENTకి వెళ్ళింది

నలుగురికి నాలుగు వాటాలుగా విడిపోయింది

ఎదురెదురుగా ఉన్నా ఒకరి ముఖం ఇంకొకరం చూచుకోము

ఏనాడైనా ఎదురు పడినా ఒకరిని ఒకరం పలకరించుకోము //

నాడు కన్న వాళ్ళు వాళ్ళు ఉన్నా లేకున్నా కలిసి ఉండమన్నారు

నేడు ఇంటికి వచ్చిన కోడళ్ళు ససేమిరా అని అన్నారు

అందరూ పెత్తనం కావాలని కోరుకున్నారు

ఎవరిని అడిగినా సర్దుకోమని చెప్పినారు //

కన్న వాళ్ళు కనుమూసిన ఏడాది లోపునే ఈ ఇంట గోడ వెలిసింది

అన్నదమ్ముల మధ్య మాటలున్నా తోడికోడళ్ళ సంబంధం తెగింది

కోడళ్ళ మూలంగా అన్నదమ్ముల మధ్య మాటలు లేకున్నాయి

ఒకరి కొకరు ఎదురుపడితే పలకరింపులు కూడా కరువయినాయి //

ఏ శుభకార్యమైనా ఎవరి ఇంట్లో వాళ్ళు చేసుకుంటాము

మాట వరసకైనా ఇతరులను పిలువకున్నాము

ఈ రోజుకి ఆ ఇంటి మీది కాకి ఈ ఇంటి మీద వాలదు

మాట వరసకైనా ఇంకొకరి గురించి చర్చ  కూడా జరగదు //

పెద్దల గొడవల మూలంగా పిల్లలు మాట్లాడుకోకున్నారు

చిన్ననాటి నుంచే పెద్దలు బంధాలను తెంచేసినారు

ఈ రోజున పిల్లలకు వారి కుటుంబ సభ్యులు తప్ప వేరెవరు తెల్వదు

ఈ బాధ అన్నది ఒంటరి జీవితంలో ఎప్పటికైనా తెలియక పోదు //

మధిర వెంకట రమణ, హైదరాబాద్