(549) (20.02.2026)

అమ్మా నీకు పెళ్ళి చేసి అత్త వారింటికి పంపించినాము

అపుడపుడు మమ్ము చూడటానికి వస్తావని ఆశించినాము

మంచి ఉన్న సంబంధం దొరికిందని మము మరిచినావు

ఆపై పుట్టినింటికి రావడమే మానుకున్నావు // 

ఇంద్ర భవనం లాటి ఇల్లు అని

ప్రతి పనికి పని వాళ్ళు ఉంటారని

ఏ పని చేయవలసిన అవసరం లేదని

రాణిలా బ్రతుకుతున్నానని //

రెండు గదుల ఇంటిలో ఉండలేనని

కట్టెల పొయ్యి మీద వండే వంట తినలేనని

సుఖానికి అలవాటు పడ్డానని

కష్టపడటానికి మనసు ఒప్పుకోదని //

మా ముఖం మీదే చెప్పినావు

అందుకే రాలేనని అన్నావు

పెళ్ళికి ముందు రోజులు గుర్తు చేసుకో

మన జీవన విధానాన్ని తలచుకో //

ఉన్న వారి సంబంధం వచ్చిందని విర్ర వీగకు

వారితో పోల్చుకుని మాకు దూరం కాబోకు

ఎంతైనా మేము నిను కన్న వాళ్ళము

మా ఊపిరి ఉన్నంత వరకు నిను చూడకుండా ఉండలేము //

మేము బ్రతికి ఉన్నంత వరకు రాను అన్న మాట అనబోకు

అక్కడి ఆస్తిని చూచి మమ్ము చిన్న చూపు చూడకు

నీ కన్న వారిని చూచేది మేము బ్రతికి ఉన్నంత వరకే

మమ్ము అమ్మ-నాన్న అని పిలిచేది మేము ఉన్నంత వరకే //

మధిర వెంకట రమణ, హైదరాబాద్